pas pus de veïculs nòus de benzina e diesel en Danemarc, als Païses Basses e en Norvègia
Dijòus, 9 de febrièr de 2017, 03h00 Internacional,Environament
Pas pus de veïculs nòus de benzina e diesel en Danemarc, als Païses Basses e en Norvègia
Aqueles tres païses an enebit la venda de veïculs nòus amb motor d’explosion partir de 2025
4 comentaris
Danemarc, Païses e Norvègia son los primièrs païses del Mond qu’an començat de luchar contra los motors de carburants d’origina fossila, en enebissent a partir de 2025 la venda de veïculs nòus amb de motors d’explosion, que sián de benzina o diesel.
Danemarc es lo país d’Euròpa amb la politica mai ferma devèrs las energias renovelablas e la consciéncia de sos ciutadans es nauta. Copenaga es la vila del continent mai lèsta per circular amb bicicleta. Pendent lo debat parlamentari, los partits d’esquèrra volián interdire, a partir de 2025, totes los veïculs de benzina e diesel. Los de drecha volián solament enebir las veituras nòvas. Fin finala se proïbirà las veituras nòvas.
Als Païses Basses, lo Congrès a aprovat l’enebicion de vendre de veïculs nòus diesel e de benzina a partir de 2025. Se i a l’aprobacion del Senat, se prevei que s’interdirà tanben los veïculs ibrids.
En Norvègia, lo Parlament a aprovat aquela mesura a l’unanimitat, amb lo vòte favorable de totes los grops politics. De remarcar que lo 24% dels veïculs d’aquel país son ja electrics. Ça que la, Norvègia es un dels grands productors de petròli d’Euròpa.