manifestacions dins tot l’estat francés per las lengas pròprias
Diluns, 26 d'octòbre de 2015, 03h00 Societat,Politica,Internacional
De manifestacions dins tot l’estat francés per las lengas pròprias
E mai se la de Montpelhièr foguèt la mai nombrosa, se manifestèt endacòm mai tanben pel breton, pel galò, pel basco, pel còrs e per l’alsacian
11 comentaris
Estrasborg (Alsàcia)
Aiacciu (Corsega)
Karaez (Bretanha)
Karaez (Bretanha)
Baiona (Bas Ador)
Etiquetas
alemand, alsacian, basco, breton, catalan, còrs, estat francés, galò, lengas, manifestacions, occitan
Al delà de la manifestacion per l’occitan e lo catalan que se debanèt a Montpelhièr, se debanèron dissabte cinc manifestacions simultanèas dins divèrsas vilas de l’estat francés, en revendicacion de las lengas pròprias de cada país. E mai se la de Montpelhièr foguèt la mai nombrosa, amb 15 000 manifestants, de manifestacions aguèron luòc tanplan a Baiona, Aiacciu, Estrasborg e Karaez.
Pel breton e lo galò en Bretanha
A Karaez aperaquí cinc mila personas s’acampèron per revendicar las doas lengas pròprias de Bretanha, lo breton e lo galò. Dins la manifestacion se podiá veire d’elegits de diferents movements amb la màger part de las associacions culturalas bretonas, e mai de grops que revendican l’unitat administrativa de Bretanha.
En Bas Ador en favor del basco
La manifestacion per la lenga basca, organizada per Deiadar e Euskal Konfederazioa, se debanèt a Baiona. Los manifestants revendiquèron tanben una organizacion administrativa pel Bascoat.
En Corsega per l’oficialitat
En Corsega qualques centenats de personas s’amassèron davant la prefectura a Aiacciu per exigir la cooficilitat dels còrs dins l’illa. Los manifestants portavan de bandièras còrsas e d’afichas e s’acampèron pendent una ora.
A Estrasborg per l’alsacian
Fin finala, a Estrasborg, un milièr de personas marchèron per revendicar lor lenga pròpria, la varietat alsaciana de l’alemand.