el país servís pas qu’a conflar los privilègis de París
Divendres, 18.9.2015 03h00
Lo corpatàs ditz a l’agaça: “tu, siás negra!”
Aqueste reproverbi provençal va fòrça plan als jacobins fanatics quand parlan de la volontat autonomista o independentista d’unas regions d’Euròpa talas coma Escòcia, Catalonha o Venecia; d’efiech, lo repròchi que mai sovent se pòt ausir es lo seguent, e se pensan fins e aubiroses de te l’emmandar pel morre! “De segur, son las regions richassas que vòlon pas partejar lor ben amb las regions pauras! Son de gosta-solets aquel monde!!”
A òc? aquò’s estranh, coma se ditz en francés? “la paille et la poutre?”, an pas brica l’ideia d’espinchar mai luènh que lor nas, son talament encloscats per la propaganda chauvinista “republicana” de l’egalitat(risme) , que s’avisan pas brica que la pus rica e potenta region d’Europa es l’IDF, valent a dire París, amb quasiment 30% dels sètis socials, mai de 80% del budget de la cultura eca… e que per çò qu’es de partejar, parlem-ne! Qual va deure pagar pel “Grand París”? Quant de moneda la region capitala autreja a sas “Províncias” (3,5 %?!), fin finala aquela region es una mega region independenta, e los encloscats jacobins son incapable de o veire! La rèsta del país servís pas qu’a conflar los privilègis de París, alavetz, ai la solucion a tot aquò, que l’IDF siá vertadièrament un estat, e que nos laisse estar!
La mapa seguenta balha un imatge espaurugant de l’estat de França; remarcaretz qu’Occitania i apareis extraordinariament clara!
